KHwah sach jaan meri baat ko tu KHwah ki jhuT

ḳhvāh sach jaan mirī baat ko tū ḳhvāh ki jhuuT

sach kahūñ sach ko agar tere to vallāh ki jhuuT

sach agar bole tū ham se to bhalā kyā ho ḳhushī

jī meñ jī aatā hai sun kar tirā har gaah ki jhuuT

raast gar pūchhe to hai raast ki tujh meñ nahīñ mehr

apnī haT-dharmī se kahtā hai tū ai maah ki jhuuT

jhūT-mūT un se maiñ kuchh maslahatan bolūñgā

sach hai tū bol na uThiyo dil-e-āgāh ki jhuuT

maiñ jo pūchhā ki tujhe ġhairoñ se hai raah to vo

pher kar muñh ko lagā kahne be-ikarāh ki jhuuT

koī itnā bhī burā kartā hai merī hī tarah

kyuuñ bhalā sach hai na ye ai but-e-dil-ḳhvāh ki jhuuT

dil to vāqif hai bahut vaañ se Tuk ik sach kahnā

lāvbālī hai mire yaar kī dargāh ki jhuuT

mujh se jab miltā hai tab chheḌ ke pūchhe hai yahī

ye 'hasan' sach hī to rakhtā hai mirī chaah ki jhuuT

kyā javāb us kā mire paas ba-juz ḳhāmoshī

yā magar ye ki yahī har gah kahūñ aah ki jhuuT

KHwah sach jaan meri baat ko tu KHwah ki jhuT

sach kahun sach ko agar tere to wallah ki jhuT

sach agar bole tu hum se to bhala kya ho KHushi

ji mein ji aata hai sun kar tera har gah ki jhuT

rast gar puchhe to hai rast ki tujh mein nahin mehr

apni haT-dharmi se kahta hai tu ai mah ki jhuT

jhuT-muT un se main kuchh maslahatan bolunga

sach hai tu bol na uThiyo dil-e-agah ki jhuT

main jo puchha ki tujhe ghairon se hai rah to wo

pher kar munh ko laga kahne be-ikarah ki jhuT

koi itna bhi bura karta hai meri hi tarah

kyun bhala sach hai na ye ai but-e-dil-KHwah ki jhuT

dil to waqif hai bahut wan se Tuk ek sach kahna

lawbaali hai mere yar ki dargah ki jhuT

mujh se jab milta hai tab chheD ke puchhe hai yahi

ye 'hasan' sach hi to rakhta hai meri chah ki jhuT

kya jawab us ka mere pas ba-juz KHamoshi

ya magar ye ki yahi har gah kahun aah ki jhuT