KHwahishon ki maut ka yaro bhala chaha karo

ḳhvāhishoñ kī maut kā yaaro bhalā chāhā karo

phailtī tārīkiyoñ meñ chāñd kā charchā karo

be-mahābā jam hī jaa.eñ dard kī jab mahfileñ

apne ġham ko shahr-e-baḳht-e-nā-rasā samjhā karo

lahlahātī vādiyoñ se ḳhūb-tar haiñ reg-zār

dil ke sahrā meñ gulistāñ kī fazā paidā karo

rañj kī gahrā.iyoñ kī tah ko paane ke liye

dostoñ kī dushmanī ko bhī atā jaanā karo

āqibat kī fikr nā-dānoñ kā hissa hī sahī

āqibat ke tazkire par barmalā royā karo

talḳh-tar ho zindagī to lutf de shāyad sivā

nā-shanāsāoñ kī ḳhātir āshnā DhūñDā karo

kyā se kyā shakleñ dikhātā hai fareb-e-āgahī

dasht-e-imkāñ se koī zarra uThā laayā karo

azmat-e-insāñ ke dukh meñ ghul rahā hai ahd-e-nau

is masīhā ke liye mil kar duā māñgā karo

ḳharch uThtā hī nahīñ aur rañg laatā hai ġhazab

be-gunah ke ḳhuuñ se bhī qashqa zarā khīñchā karo

ḳhaak uḌtī hai ki raushan husn kā āñchal huā

chehra-e-gītī ba-sad-bīm-o-rajā dekhā karo

KHwahishon ki maut ka yaro bhala chaha karo

phailti tarikiyon mein chand ka charcha karo

be-mahaba jam hi jaen dard ki jab mahfilen

apne gham ko shahr-e-baKHt-e-na-rasa samjha karo

lahlahati wadiyon se KHub-tar hain reg-zar

dil ke sahra mein gulistan ki faza paida karo

ranj ki gahraiyon ki tah ko pane ke liye

doston ki dushmani ko bhi ata jaana karo

aaqibat ki fikr na-danon ka hissa hi sahi

aaqibat ke tazkire par barmala roya karo

talKH-tar ho zindagi to lutf de shayad siwa

na-shanasaon ki KHatir aashna DhunDa karo

kya se kya shaklen dikhata hai fareb-e-agahi

dasht-e-imkan se koi zarra uTha laya karo

azmat-e-insan ke dukh mein ghul raha hai ahd-e-nau

is masiha ke liye mil kar dua manga karo

KHarch uThta hi nahin aur rang lata hai ghazab

be-gunah ke KHun se bhi qashqa zara khincha karo

KHak uDti hai ki raushan husn ka aanchal hua

chehra-e-giti ba-sad-bim-o-raja dekha karo