KHwahishon se bar-sar-e-paikar ho jaana paDa

ḳhvāhishoñ se bar-sar-e-paikār ho jaanā paḌā

ḳhud hī dil kī raah meñ dīvār ho jaanā paḌā

un se pūchho rizq kī majbūriyāñ kyā chiiz haiñ

sub.h hote hī jinheñ bedār ho jaanā paḌā

nam uThā.e phir rahe the apnī āñkhoñ meñ sabhī

aa.ine ko ek din zañgār ho jaanā paḌā

ism paḌhnā thā ki saa.e chīḳhne par aa ga.e

sab ke sab sāyoñ ko phir ashjār ho jaanā paḌā

kaaT bhī rakhnā paḌī lahje meñ aahan dhaar kī

maḳhmalīñ lafzoñ ko jab talvār ho jaanā paḌā

maiñ ne sab ahbāb ko ḳhush rakkhā jitnā ho sakā

yuuñ 'fidā' har din mujhe mismār ho jaanā paḌā

KHwahishon se bar-sar-e-paikar ho jaana paDa

KHud hi dil ki rah mein diwar ho jaana paDa

un se puchho rizq ki majburiyan kya chiz hain

subh hote hi jinhen bedar ho jaana paDa

nam uThae phir rahe the apni aankhon mein sabhi

aaine ko ek din zangar ho jaana paDa

ism paDhna tha ki sae chiKHne par aa gae

sab ke sab sayon ko phir ashjar ho jaana paDa

kaT bhi rakhna paDi lahje mein aahan dhaar ki

maKHmalin lafzon ko jab talwar ho jaana paDa

main ne sab ahbab ko KHush rakkha jitna ho saka

yun 'fida' har din mujhe mismar ho jaana paDa