ki phir paida meri KHatir koi mushkil na ho jae

ki phir paidā mirī ḳhātir koī mushkil na ho jaa.e

pareshāñ huuñ ye merā dil kahīñ buzdil na ho jaa.e

bhañvar meñ merī kashtī ko yahī ehsās rahtā hai

Dubone meñ mirā ye nāḳhudā shāmil na ho jaa.e

isī ik ḳhauf se maiñ apnī palkeñ tak nahīñ jhapkūñ

ki us kā chehra āñkhoñ se merī ojhal na ho jaa.e

mujhe is baat kī har lamha itnī fikr rahtī hai

ki us kī yaad se merā ye dil ġhāfil na ho jaa.e

kabhī us kī jafāoñ kī shikāyat karnā bhī chāhūñ

magar phir sochtī huuñ vo kahīñ bad-dil na ho jaa.e

bhalā thak haar kar baiThūñ 'robīna' to kahāñ baiThūñ

jise maiñ chhoḌnā chāhūñ mirī manzil na ho jaa.e

ki phir paida meri KHatir koi mushkil na ho jae

pareshan hun ye mera dil kahin buzdil na ho jae

bhanwar mein meri kashti ko yahi ehsas rahta hai

Dubone mein mera ye naKHuda shamil na ho jae

isi ek KHauf se main apni palken tak nahin jhapkun

ki us ka chehra aankhon se meri ojhal na ho jae

mujhe is baat ki har lamha itni fikr rahti hai

ki us ki yaad se mera ye dil ghafil na ho jae

kabhi us ki jafaon ki shikayat karna bhi chahun

magar phir sochti hun wo kahin bad-dil na ho jae

bhala thak haar kar baiThun 'robina' to kahan baiThun

jise main chhoDna chahun meri manzil na ho jae