kibriyai ki ada tujh mein hai

kibriyā.ī kī adā tujh meñ hai

garche tū but hai ḳhudā tujh meñ hai

shoḳhī o nāz-o-adā tujh meñ hai

yā ye ik qahr-e-ḳhudā tujh meñ hai

muñh chhupātā hai tū ā.īne se

kis qadar sharm-o-hayā tujh meñ hai

ḳhair-bāshad ki mire ḳhuun kī sī

surḳhī ai rañg-e-hinā tujh meñ hai

pūchh letā hai tū auroñ se mujhe

baare itnī to vafā tujh meñ hai

gul hai behāl ye kis gesū kī

nik.hat ai bād-e-sabā tujh meñ hai

dil ko khīñche hai tirī zulf-e-siyāh

sehr jaadū kī balā tujh meñ hai

ho na ai ḳhaak ke putle maġhrūr

is pe tū ye jo havā tujh meñ hai

sab ye naqsha hai tirā āryatī

ik zarā soch to kyā tujh meñ hai

tū jo yuuñ gul ko banā detī hai

kuchh to ai bād-e-sabā tujh meñ hai

'mus.hafī' se tū milā de us ko

ye asar dast-e-duā tujh meñ hai

kibriyai ki ada tujh mein hai

garche tu but hai KHuda tujh mein hai

shoKHi o naz-o-ada tujh mein hai

ya ye ek qahr-e-KHuda tujh mein hai

munh chhupata hai tu aaine se

kis qadar sharm-o-haya tujh mein hai

KHair-bashad ki mere KHun ki si

surKHi ai rang-e-hina tujh mein hai

puchh leta hai tu auron se mujhe

bare itni to wafa tujh mein hai

gul hai behaal ye kis gesu ki

nikhat ai baad-e-saba tujh mein hai

dil ko khinche hai teri zulf-e-siyah

sehr jadu ki bala tujh mein hai

ho na ai KHak ke putle maghrur

is pe tu ye jo hawa tujh mein hai

sab ye naqsha hai tera aaryati

ek zara soch to kya tujh mein hai

tu jo yun gul ko bana deti hai

kuchh to ai baad-e-saba tujh mein hai

'mushafi' se tu mila de us ko

ye asar dast-e-dua tujh mein hai