ki aah humne lekin usne idhar na dekha

kī aah ham ne lekin us ne idhar na dekhā

is aah meñ to ham ne kuchh bhī asar na dekhā

kyā kyā bahāreñ aa.iiñ kyā kyā daraḳht phūle

naḳhl-e-duā ko lekin maiñ bārvar na dekhā

hargiz huā na yaaro vo shoḳh yaar apnā

ziiñ pesh varna ham ne kyā kyā ki kar na dekhā

rahte haiñ kyā bhalā vaañ āfat-zade hī saare

us kūche meñ kisī kā ābād ghar na dekhā

pahuñchā galī tak us ke aage khaḌā rahā maiñ

aage qadam ke rakhte phir nāma-bar na dekhā

do do pahar tak us ke aage khaḌā rahā maiñ

par us ne zid ke maare bhar kar nazar na dekhā

kyā fā.eda rakkhe hai bas ab zyāda mat ro

ronā tirā kisī ne ai chashm-e-tar na dekhā

kal yaar kī galī meñ DhūñDā jo 'mus.hafī' ko

ik laash to paḌī thī par us kā sar na dekhā

ki aah hum ne lekin us ne idhar na dekha

is aah mein to hum ne kuchh bhi asar na dekha

kya kya bahaaren aain kya kya daraKHt phule

naKHl-e-dua ko lekin main barwar na dekha

hargiz hua na yaro wo shoKH yar apna

zin pesh warna hum ne kya kya ki kar na dekha

rahte hain kya bhala wan aafat-zade hi sare

us kuche mein kisi ka aabaad ghar na dekha

pahuncha gali tak us ke aage khaDa raha main

aage qadam ke rakhte phir nama-bar na dekha

do do pahar tak us ke aage khaDa raha main

par us ne zid ke mare bhar kar nazar na dekha

kya faeda rakkhe hai bas ab zyaada mat ro

rona tera kisi ne ai chashm-e-tar na dekha

kal yar ki gali mein DhunDa jo 'mushafi' ko

ek lash to paDi thi par us ka sar na dekha