kin KHayalon mein tu dilbar paDa hai

kin ḳhayāloñ meñ tū dilbar paḌā hai

ek se ek yahāñ par paḌā hai

maiñ vo darvesh huuñ jis kā zamāne

sat.h-e-aflāk pe bistar paḌā hai

āsmāñ kī ye bulandī nahīñ kuchh

āsmāñ to mire sar par paḌā hai

ek nādāñ se sanam kī galī meñ

ek ustād hunar-var paḌā hai

'mīr' kahte the jise sañg-e-girāñ

mere dil par vahī patthar paḌā hai

dhuup meñ ḳhvār phirūñ maiñ mirā dil

zulf ke saa.e meñ ḳhush-tar paḌā hai

mere ashkoñ meñ mire sher haiñ tar

saarā ḳhitta zamīñ kā tar paḌā hai

yuuñ hī 'hāvī' maiñ ugaltā nahīñ dur

mere qadmoñ meñ samundar paḌā hai

kin KHayalon mein tu dilbar paDa hai

ek se ek yahan par paDa hai

main wo darwesh hun jis ka zamane

sath-e-aflak pe bistar paDa hai

aasman ki ye bulandi nahin kuchh

aasman to mere sar par paDa hai

ek nadan se sanam ki gali mein

ek ustad hunar-war paDa hai

'mir' kahte the jise sang-e-giran

mere dil par wahi patthar paDa hai

dhup mein KHwar phirun main mera dil

zulf ke sae mein KHush-tar paDa hai

mere ashkon mein mere sher hain tar

sara KHitta zamin ka tar paDa hai

yun hi 'hawi' main ugalta nahin dur

mere qadmon mein samundar paDa hai