kin manzilon mein gardish-e-lail-o-nahaar hai

kin manziloñ meñ gardish-e-lail-o-nahār hai

un kā karam bhī merī tabī.at pe baar hai

merī zabāñ pe harf-e-shikāyat kā mudda.ā

un kī zabāñ pe va.ada-e-be-e'tibār hai

dekhe ulaT ke koī jo tārīḳh ke varaq

har naġhma merā zāmin-e-fasl-e-bahār hai

ik kashmakash sī ho ga.ī maut-o-hayāt meñ

āñkhoñ ko merī jab se tirā intizār hai

ḳhud apne aap jaan le apne maqām ko

nau-e-bashar zarā bhī agar burdbār hai

phailī huī hai jab se chaman meñ ḳhizāñ kī baat

simTā huā sā jalva-e-husn-e-bahār hai

khātā hai kitnā ġham koī piitā hai kitnī mai

'rāje' ye apne zarf pe dār-o-madār hai

kin manzilon mein gardish-e-lail-o-nahaar hai

un ka karam bhi meri tabiat pe bar hai

meri zaban pe harf-e-shikayat ka muddaa

un ki zaban pe wada-e-be-e'tibar hai

dekhe ulaT ke koi jo tariKH ke waraq

har naghma mera zamin-e-fasl-e-bahaar hai

ek kashmakash si ho gai maut-o-hayat mein

aankhon ko meri jab se tera intizar hai

KHud apne aap jaan le apne maqam ko

nau-e-bashar zara bhi agar burdbar hai

phaili hui hai jab se chaman mein KHizan ki baat

simTa hua sa jalwa-e-husn-e-bahaar hai

khata hai kitna gham koi pita hai kitni mai

'raje' ye apne zarf pe dar-o-madar hai