kinaron se juda hota nahin tughyaniyon ka dukh

kināroñ se judā hotā nahīñ tuġhyāniyoñ kā dukh

na.ī maujoñ meñ rahtā hai purāne pāniyoñ kā dukh

kahīñ muddat huī us ko gañvāyā thā magar ab tak

mirī āñkhoñ meñ hai un be-sar-o-sāmāniyoñ kā dukh

to kyā tū bhī mirī ujḌī huī bastī se guzrā hai

to kyā tū ne bhī dekhā hai mirī vīrāniyoñ kā dukh

shikast-e-ġham ke lamhoñ meñ jo ġham-ālūd ho jaa.eñ

zamīñ hāthoñ pe le letī hai un peshāniyoñ kā dukh

miyān-e-aks-o-ā.īna abhī kuchh gard baaqī hai

abhī pahchān meñ aayā nahīñ hairāniyoñ kā dukh

maiñ pahle DhūñDhtā huuñ ik zarā āsāniyāñ aur phir

baḌī mushkil meñ rakhtā hai mujhe āsāniyoñ kā dukh

kinaron se juda hota nahin tughyaniyon ka dukh

nai maujon mein rahta hai purane paniyon ka dukh

kahin muddat hui us ko ganwaya tha magar ab tak

meri aankhon mein hai un be-sar-o-samaniyon ka dukh

to kya tu bhi meri ujDi hui basti se guzra hai

to kya tu ne bhi dekha hai meri viraniyon ka dukh

shikast-e-gham ke lamhon mein jo gham-alud ho jaen

zamin hathon pe le leti hai un peshaniyon ka dukh

miyan-e-aks-o-aina abhi kuchh gard baqi hai

abhi pahchan mein aaya nahin hairaniyon ka dukh

main pahle DhunDhta hun ek zara aasaniyan aur phir

baDi mushkil mein rakhta hai mujhe aasaniyon ka dukh