kirdar hi se zinat-e-aflak ho gae

kirdār hī se zīnat-e-aflāk ho ga.e

kirdār gir gayā ḳhas-o-ḳhāshāk ho ga.e

ham jaise sāda-lauh ko duniyā ke haath se

aisī sazā milī hai ki chālāk ho ga.e

shāyad bahār aa ga.ī mauj-e-junūñ liye

dāman jo sil ga.e the vo phir chaak ho ga.e

kal tak davā-e-dard the kuchh log shahr meñ

aaj eqtidār kyā milā zahhāk ho ga.e

qismat kā thā mazāq ki ik husn-e-ittifāq

aa.ī hamārī yaad jab ham ḳhaak ho ga.e

un kī nazar ne 'tāhira' aisā asar kiyā

jo darmiyāñ hisāb the sab paak ho ga.e

kirdar hi se zinat-e-aflak ho gae

kirdar gir gaya KHas-o-KHashak ho gae

hum jaise sada-lauh ko duniya ke hath se

aisi saza mili hai ki chaalak ho gae

shayad bahaar aa gai mauj-e-junun liye

daman jo sil gae the wo phir chaak ho gae

kal tak dawa-e-dard the kuchh log shahr mein

aaj eqtidar kya mila zahhak ho gae

qismat ka tha mazaq ki ek husn-e-ittifaq

aai hamari yaad jab hum KHak ho gae

un ki nazar ne 'tahira' aisa asar kiya

jo darmiyan hisab the sab pak ho gae