kis dasht-e-talab mein kho gae hum

kis dasht-e-talab meñ kho ga.e ham

saaya jo milā to so ga.e ham

lo aaj bhulā diyā tumheñ bhī

lo aaj tumhāre ho ga.e ham

ai shama-e-firāq bujh chukī shab

ai sā.at-e-vasl so ga.e ham

phir apnā nishāñ kahīñ na paayā

uTh kar tire saath to ga.e ham

yuuñ sub.h ke bhūle apne ghar ko

lauTe haiñ ki aur kho ga.e ham

jab aañkh khulī to ham nahīñ the

jaage haiñ ki ḳhvāb ho ga.e ham

ashkoñ ne ajiib gul khilā.e

kyā naqsh-o-nigār bo ga.e ham

khoyā hai use to ḳhud ko paayā

paayā hai use to kho ga.e ham

kis dasht-e-talab mein kho gae hum

saya jo mila to so gae hum

lo aaj bhula diya tumhein bhi

lo aaj tumhaare ho gae hum

ai shama-e-firaq bujh chuki shab

ai saat-e-wasl so gae hum

phir apna nishan kahin na paya

uTh kar tere sath to gae hum

yun subh ke bhule apne ghar ko

lauTe hain ki aur kho gae hum

jab aankh khuli to hum nahin the

jage hain ki KHwab ho gae hum

ashkon ne ajib gul khilae

kya naqsh-o-nigar bo gae hum

khoya hai use to KHud ko paya

paya hai use to kho gae hum