kis din ba-rang-e-zaKHm naya gul khila nahin

kis din ba-rañg-e-zaḳhm nayā gul khilā nahīñ

kis shab ba-faiz-e-ashk charāġhāñ huā nahīñ

ik sahm hai ki har kahīñ rahtā hai saath saath

ik vahm hai ki aaj bhī dil se gayā nahīñ

ai dost rāh-e-zīst meñ chal ehtiyāt se

girte hue ko koī yahāñ thāmtā nahīñ

go zehn se shabīh tirī mahv ho ga.ī

lekin tire ḳhayāl kā sūraj bujhā nahīñ

man kā tamām zauq-e-safar ghaT ke rah gayā

tan ke samundaroñ meñ kahīñ rāsta nahīñ

'ā.alī' varūd-e-sher meñ vaqfa bajā magar

ab ke to ek umr huī kuchh kahā nahīñ

kis din ba-rang-e-zaKHm naya gul khila nahin

kis shab ba-faiz-e-ashk charaghan hua nahin

ek sahm hai ki har kahin rahta hai sath sath

ek wahm hai ki aaj bhi dil se gaya nahin

ai dost rah-e-zist mein chal ehtiyat se

girte hue ko koi yahan thamta nahin

go zehn se shabih teri mahw ho gai

lekin tere KHayal ka suraj bujha nahin

man ka tamam zauq-e-safar ghaT ke rah gaya

tan ke samundaron mein kahin rasta nahin

'aali' warud-e-sher mein waqfa baja magar

ab ke to ek umr hui kuchh kaha nahin