kis jagah jata hai aur kaun se dar jata hai

kis jagah jaatā hai aur kaun se dar jaatā hai

tere dar se jo palaT aa.e kidhar jaatā hai

manzar-e-ām pe aatā hai to Dar jaatā hai

ashk merā mire andar hī bikhar jaatā hai

kyā huā chhoḌ ki har baar agar jaatā hai

do ghaḌī mujh se magar baat to kar jaatā hai

aaj vo zaḳhm kī tāsīr se tar jaatā hai

vo jo kahtā thā miyāñ zaḳhm hai bhar jaatā hai

kis kī yādoñ ke diye zaḳhm mujhe chubhte haiñ

kaun hai jo mirī āñkhoñ meñ Thahar jaatā hai

aadmī dil meñ utar jaa.e to zinda hai magar

aadmī dil se utar jaa.e to mar jaatā hai

kis kā ḳhuuñ hai ki ye miTTī bhī taḌapne lagī hai

nok-e-neza pe ye kis mard kā sar jaatā hai

kis jagah jata hai aur kaun se dar jata hai

tere dar se jo palaT aae kidhar jata hai

manzar-e-am pe aata hai to Dar jata hai

ashk mera mere andar hi bikhar jata hai

kya hua chhoD ki har bar agar jata hai

do ghaDi mujh se magar baat to kar jata hai

aaj wo zaKHm ki tasir se tar jata hai

wo jo kahta tha miyan zaKHm hai bhar jata hai

kis ki yaadon ke diye zaKHm mujhe chubhte hain

kaun hai jo meri aankhon mein Thahar jata hai

aadmi dil mein utar jae to zinda hai magar

aadmi dil se utar jae to mar jata hai

kis ka KHun hai ki ye miTTi bhi taDapne lagi hai

nok-e-neza pe ye kis mard ka sar jata hai