kis ke naghme gunjte hain zindagi ke saz mein

kis ke naġhme gūñjte haiñ zindagī ke saaz meñ

ik na.ī āvāz shāmil hai mirī āvāz meñ

mere ghar meñ chhā rahī thī shām-e-ġham kī tīrgī

jab ujālā ho rahā thā jalva-gāh-e-nāz meñ

dard-e-dil meñ yuuñ bhī jab hotī nahīñ koī kamī

kyā zarūrī hai izāfa husn ke andāz meñ

maiñ agar ḳhāmosh huuñ ḳhāmosh rahne dījiye

merī ḳhāmoshī se kyā kyā hādse haiñ raaz meñ

ham ne dekhe haiñ kuchh aise bhī asīrān-e-chaman

jin kī saarī umr guzrī hasrat-e-parvāz meñ

hañs rahā huuñ yaad kar ke ishq kī nādāniyāñ

sun rahā huuñ dāstāñ apnī tire andāz meñ

tum na hote is qadar rusvā zamāne meñ 'shajī.a'

soch lete ishq kā anjām agar āġhāz meñ

kis ke naghme gunjte hain zindagi ke saz mein

ek nai aawaz shamil hai meri aawaz mein

mere ghar mein chha rahi thi sham-e-gham ki tirgi

jab ujala ho raha tha jalwa-gah-e-naz mein

dard-e-dil mein yun bhi jab hoti nahin koi kami

kya zaruri hai izafa husn ke andaz mein

main agar KHamosh hun KHamosh rahne dijiye

meri KHamoshi se kya kya hadse hain raaz mein

hum ne dekhe hain kuchh aise bhi asiran-e-chaman

jin ki sari umr guzri hasrat-e-parwaz mein

hans raha hun yaad kar ke ishq ki nadaniyan

sun raha hun dastan apni tere andaz mein

tum na hote is qadar ruswa zamane mein 'shajia'

soch lete ishq ka anjam agar aaghaz mein