kis ki ye siyasat hai kis ki hain ye tadbiren

kis kī ye siyāsat hai kis kī haiñ ye tadbīreñ

rahzanoñ ne paa.ī haiñ rahbaroñ kī taqdīreñ

mere ḳhvāb-e-vahshat kī jaane kyā hoñ ta.abīreñ

daar hai na zindāñ hai tauq hai na zanjīreñ

aap kī amānat haiñ aap hī miTā diije

ye nuqūsh ulfat ke ye vafā kī tahrīreñ

kah rahā hai sadiyoñ se taaj kā hasīñ chehra

fan agar mukammal ho boltī haiñ tasvīreñ

log jaane kyuuñ us ko kah rahe haiñ dīvāna

vo to apne ḳhvāboñ kī DhūñDhtā hai ta.abīreñ

luuT leñ na farzāne azmat-e-junūñ 'sumbul'

thak ga.e haiñ dīvāne so ga.ī haiñ zanjīreñ

kis ki ye siyasat hai kis ki hain ye tadbiren

rahzanon ne pai hain rahbaron ki taqdiren

mere KHwab-e-wahshat ki jaane kya hon tabiren

dar hai na zindan hai tauq hai na zanjiren

aap ki amanat hain aap hi miTa dije

ye nuqush ulfat ke ye wafa ki tahriren

kah raha hai sadiyon se taj ka hasin chehra

fan agar mukammal ho bolti hain taswiren

log jaane kyun us ko kah rahe hain diwana

wo to apne KHwabon ki DhunDhta hai tabiren

luT len na farzane azmat-e-junun 'sumbul'

thak gae hain diwane so gai hain zanjiren