kis kis ko ab rona hoga jaane kya kya bhul gaya

kis kis ko ab ronā hogā jaane kyā kyā bhuul gayā

chashm o lab kā zikr hī kyā hai maiñ to sarāpā bhuul gayā

us ne to shāyad bād-e-sabā se nāma-e-ḳhushbū bhejā thā

us ko ḳhabar kyā mujh ko chaman kā patta patta bhuul gayā

shahr-e-shab meñ apnī faqat ik najm-e-sahar se yaarī thī

ham kuchh aise so.e vo bhī rafta rafta bhuul gayā

ābla-pā huuñ āp-apne hī naqsh-e-qadam se Dartā huuñ

tanhā tanhā phirte phirte apnā saaya bhuul gayā

'shāz' se pūchho o saudā.ī kis kī dhun meñ phirtā hai

kis kī bāteñ yaad aatī haiñ kis kā chehra bhuul gayā

kis kis ko ab rona hoga jaane kya kya bhul gaya

chashm o lab ka zikr hi kya hai main to sarapa bhul gaya

us ne to shayad baad-e-saba se nama-e-KHushbu bheja tha

us ko KHabar kya mujh ko chaman ka patta patta bhul gaya

shahr-e-shab mein apni faqat ek najm-e-sahar se yari thi

hum kuchh aise soe wo bhi rafta rafta bhul gaya

aabla-pa hun aap-apne hi naqsh-e-qadam se Darta hun

tanha tanha phirte phirte apna saya bhul gaya

'shaz' se puchho o saudai kis ki dhun mein phirta hai

kis ki baaten yaad aati hain kis ka chehra bhul gaya