kis kis ko main muaf karun sab nashe mein hain

kis kis ko maiñ muaaf karūñ sab nashe meñ haiñ

bande nashe meñ haiñ to yahāñ rab nashe meñ haiñ

ham ne zarā sā sach tirā duniyā jo kah diyā

kahtī ye phir rahī hai ki ham sab nashe meñ haiñ

chalnā sikhā rahe haiñ hameñ ye purāne rind

maktab sabhī nashe meñ haiñ maz.hab nashe meñ haiñ

ham pī ke bhī salīqe se hī laḌkhaḌā.e haiñ

un meñ se ham nahīñ haiñ jo beDhab nashe meñ haiñ

mahñgī agar huī hai to thoḌī sī kyoñ piyeñ

pī kar sharāb muft kī har shab nashe meñ haiñ

saaqī vo rind aur haiñ jin ko nahīñ hai hosh

de ek jaam aur ki ham kab nashe meñ haiñ

merī ġhazal pe aap jo karte haiñ vaah vaah

haiñ aap mere jaise hī matlab nashe meñ haiñ

bose ko tishna-lab bhī haiñ ham donoñ 'āshnā'

ye aur baat donoñ ke hī lab nashe meñ haiñ

kis kis ko main muaf karun sab nashe mein hain

bande nashe mein hain to yahan rab nashe mein hain

hum ne zara sa sach tera duniya jo kah diya

kahti ye phir rahi hai ki hum sab nashe mein hain

chalna sikha rahe hain hamein ye purane rind

maktab sabhi nashe mein hain mazhab nashe mein hain

hum pi ke bhi saliqe se hi laDkhaDae hain

un mein se hum nahin hain jo beDhab nashe mein hain

mahngi agar hui hai to thoDi si kyon piyen

pi kar sharab muft ki har shab nashe mein hain

saqi wo rind aur hain jin ko nahin hai hosh

de ek jam aur ki hum kab nashe mein hain

meri ghazal pe aap jo karte hain wah wah

hain aap mere jaise hi matlab nashe mein hain

bose ko tishna-lab bhi hain hum donon 'ashna'

ye aur baat donon ke hi lab nashe mein hain