kis ko hoga tere aane ka pata mere baad

kis ko hogā tire aane kā pata mere ba.ad

kaun sun pā.egā lamhoñ kī sadā mere ba.ad

jis se yādoñ ke shabistān mahak uThte the

isī ḳhushbū ko tarastī hai sabā mere ba.ad

maiñ to ik raqs thā kuchh rañg-bhare zarroñ kā

raaz ye ahl-e-zamāna pe khulā mere ba.ad

bām-o-dar chīḳhte haiñ reñgtī tanhā.ī meñ

shahr meñ ḳhaak uḌātī hai havā mere ba.ad

hāl-e-dil kis se kahe kis se lipaT kar ro.e

shahr-dar-shahr bhaTaktī hai ghaTā mere ba.ad

koī suntā nahīñ vīrān paḌe haiñ kamre

sar paTaḳhtī hai kivāḌoñ se havā mere ba.ad

'shām' ke sañg se hī chāñdnī shab phūTegī

dar-ba-dar phailtī jā.egī ziyā mere ba.ad

kis ko hoga tere aane ka pata mere baad

kaun sun paega lamhon ki sada mere baad

jis se yaadon ke shabistan mahak uThte the

isi KHushbu ko tarasti hai saba mere baad

main to ek raqs tha kuchh rang-bhare zarron ka

raaz ye ahl-e-zamana pe khula mere baad

baam-o-dar chiKHte hain rengti tanhai mein

shahr mein KHak uDati hai hawa mere baad

haal-e-dil kis se kahe kis se lipaT kar roe

shahr-dar-shahr bhaTakti hai ghaTa mere baad

koi sunta nahin viran paDe hain kamre

sar paTaKHti hai kiwaDon se hawa mere baad

'sham' ke sang se hi chandni shab phuTegi

dar-ba-dar phailti jaegi ziya mere baad