kis ko khoya hai kis ko paya hai

kis ko khoyā hai kis ko paayā hai

bārhā ye ḳhayāl aaya hai

zindagī kī karāhatoñ par bhī

ham ko aaya to pyaar aaya hai

lutf marne meñ hai na jiine meñ

moḌ aisā bhī ek aaya hai

va.ada kar va.ada kuchh to baat bane

kis ne va.ada bhalā nibhāyā hai

aag apnī ho yā parā.ī ho

apne ashkoñ se ḳhud bujhāyā hai

zindagī kī siyāh rātoñ ko

terī yādoñ se jagmagāyā hai

bojh uThtā nahīñ hai kyā kahiye

ham ne sau sau tarah uThāyā hai

kārvāñ hai na kārvāñ kā ġhubār

ḳhizr ne gul ye kyā khilāyā hai

ham ne 'hasrat' sukūn kī ḳhātir

dushmanoñ ko gale lagāyā hai

kis ko khoya hai kis ko paya hai

barha ye KHayal aaya hai

zindagi ki karahaton par bhi

hum ko aaya to pyar aaya hai

lutf marne mein hai na jine mein

moD aisa bhi ek aaya hai

wada kar wada kuchh to baat bane

kis ne wada bhala nibhaya hai

aag apni ho ya parai ho

apne ashkon se KHud bujhaya hai

zindagi ki siyah raaton ko

teri yaadon se jagmagaya hai

bojh uThta nahin hai kya kahiye

hum ne sau sau tarah uThaya hai

karwan hai na karwan ka ghubar

KHizr ne gul ye kya khilaya hai

hum ne 'hasrat' sukun ki KHatir

dushmanon ko gale lagaya hai