kis ne di mujhko sada kaun-o-makan ke us taraf

kis ne dī mujh ko sadā kaun-o-makāñ ke us taraf

muntazir hai kaun merā āsmāñ ke us taraf

jaane kab donoñ mileñ aapas meñ sāyoñ kī tarah

do musāfir chal rahe haiñ kahkashāñ ke us taraf

tai kiyā maiñ ne safar jaldī ki maiñ jaldī meñ thā

rah gayā saaya mirā donoñ jahāñ ke us taraf

ik na ik sar par rahegā jitnā maiñ ūñchā gayā

āsmāñ kuchh aur bhī haiñ āsmāñ ke us taraf

paar utrūñgā to vo mujh ko uThā le jā.egā

ek sahrā ḳhushk bahr-e-be-karāñ ke us taraf

koī sargoshī-numā āvāz bhī aatī nahīñ

kitnī gahrī ḳhāmushī hai lā-makāñ ke us taraf

kis ne di mujh ko sada kaun-o-makan ke us taraf

muntazir hai kaun mera aasman ke us taraf

jaane kab donon milen aapas mein sayon ki tarah

do musafir chal rahe hain kahkashan ke us taraf

tai kiya main ne safar jaldi ki main jaldi mein tha

rah gaya saya mera donon jahan ke us taraf

ek na ek sar par rahega jitna main uncha gaya

aasman kuchh aur bhi hain aasman ke us taraf

par utrunga to wo mujh ko uTha le jaega

ek sahra KHushk bahr-e-be-karan ke us taraf

koi sargoshi-numa aawaz bhi aati nahin

kitni gahri KHamushi hai la-makan ke us taraf