kis ne sang-e-KHamoshi phenka bhare-bazar par

kis ne sañg-e-ḳhāmoshī pheñkā bhare-bāzār par

ik sukūt-e-marg taarī hai dar-o-dīvār par

tū ne apnī zulf ke saa.e meñ afsāne kahe

mujh ko zanjīreñ milī haiñ jur.at-e-iz.hār par

shāḳh-e-uriyāñ par khilā ik phuul is andāz se

jis tarah taaza lahū chamke na.ī talvār par

sañg-dil ahbāb ke dāman meñ rusvā.ī ke phuul

maiñ ne dekhā hai nayā manzar farāz-e-dār par

ab koī tohmat bhī vaj.h-e-karb-e-rusvā.ī nahīñ

zindagī ik umr se chup hai tire isrār par

maiñ sar-e-maqtal hadīs-e-zindagī kahtā rahā

uñgliyāñ uThtī rahīñ 'mohsin' mire kirdār par

kis ne sang-e-KHamoshi phenka bhare-bazar par

ek sukut-e-marg tari hai dar-o-diwar par

tu ne apni zulf ke sae mein afsane kahe

mujh ko zanjiren mili hain jurat-e-izhaar par

shaKH-e-uriyan par khila ek phul is andaz se

jis tarah taza lahu chamke nai talwar par

sang-dil ahbab ke daman mein ruswai ke phul

main ne dekha hai naya manzar faraaz-e-dar par

ab koi tohmat bhi wajh-e-karb-e-ruswai nahin

zindagi ek umr se chup hai tere israr par

main sar-e-maqtal hadis-e-zindagi kahta raha

ungliyan uThti rahin 'mohsin' mere kirdar par