kis pe barsegi inayat ki ghaTa mere baad

kis pe barsegī ināyat kī ghaTā mere baa'd

kaun Thahregā sazā-vār-e-ḳhatā mere baa'd

kaun sar legā mohabbat kī balā-e-nāgāh

kis ke ghar jā.egī mīrās-e-vafā mere baa'd

kaun aa.egā tire baam pe dastak dene

kaun pūchhegā tire ghar kā pata mere baa'd

ishva-o-nāz tire kaun sahegā har-dam

kaun thāmegā tirā dast-e-hinā mere baa'd

kaun rakkhegā tire zaḳhm-e-darūñ par marham

kaun kholegā tire dil kī girah mere baa'd

mujh ko ma.alūm hai paimān-e-mohabbat kyā hai

kis se uTh pā.egā ye bār-e-vafā mere baa'd

aur kuchh der kā mehmāñ huuñ sitamgar terā

phir banā.egā kise mashq-e-jafā mere baa'd

dast-e-rangīñ se pilā de mai-e-gulgūñ saaqī

kis ke kaam aa.egā ye rang-e-hinā mere baa'd

huuñ muḳhil aur koī der tirī mahfil meñ

phir karegā na koī āh-o-bukā mere baa'd

baa'd mere ruḳh-e-zebā pe khulā rang-e-lahū

koī dekhe to ye andāz-o-adā mere baa'd

rakh ke shāyad vo kahīñ bhuul ga.e the yaksar

yaad aa.ī unheñ tasvīr-e-vafā mere baa'd

baa'd marne ke unheñ aa hī gayā merā ḳhayāl

ḳhuub sūjhī hai ye ījād-e-vafā mere baa'd

maiñ amānat thā ḳhudā kī so ḳhudā tak pahuñchā

yuuñ na turbat pe karo hashr bapā mere baad

ek duniyā-e-kashākash thī mire dam se basī

kis se pur hogā ye aivān-e-ḳhalā mere baad

paḌ ga.e maañd sitāroñ ke damakte chehre

phir na aa.ī ruḳh-e-hastī pe jilā mere baa'd

jin se guzrā thā kabhī qāfila-e-zīst mirā

DhūñDhtī hai unhīñ rāhoñ ko sabā mere baa'd

mahfil-e-sher-o-suḳhan 'shaiḳh' hai suunī suunī

ho ga.ī saaz se mahrūm sadā mere baa'd

kis pe barsegi inayat ki ghaTa mere ba'd

kaun Thahrega saza-war-e-KHata mere ba'd

kaun sar lega mohabbat ki bala-e-nagah

kis ke ghar jaegi miras-e-wafa mere ba'd

kaun aaega tere baam pe dastak dene

kaun puchhega tere ghar ka pata mere ba'd

ishwa-o-naz tere kaun sahega har-dam

kaun thamega tera dast-e-hina mere ba'd

kaun rakkhega tere zaKHm-e-darun par marham

kaun kholega tere dil ki girah mere ba'd

mujh ko malum hai paiman-e-mohabbat kya hai

kis se uTh paega ye bar-e-wafa mere ba'd

aur kuchh der ka mehman hun sitamgar tera

phir banaega kise mashq-e-jafa mere ba'd

dast-e-rangin se pila de mai-e-gulgun saqi

kis ke kaam aaega ye rang-e-hina mere ba'd

hun muKHil aur koi der teri mahfil mein

phir karega na koi aah-o-buka mere ba'd

ba'd mere ruKH-e-zeba pe khula rang-e-lahu

koi dekhe to ye andaz-o-ada mere ba'd

rakh ke shayad wo kahin bhul gae the yaksar

yaad aai unhen taswir-e-wafa mere ba'd

ba'd marne ke unhen aa hi gaya mera KHayal

KHub sujhi hai ye ijad-e-wafa mere ba'd

main amanat tha KHuda ki so KHuda tak pahuncha

yun na turbat pe karo hashr bapa mere baad

ek duniya-e-kashakash thi mere dam se basi

kis se pur hoga ye aiwan-e-KHala mere baad

paD gae mand sitaron ke damakte chehre

phir na aai ruKH-e-hasti pe jila mere ba'd

jin se guzra tha kabhi qafila-e-zist mera

DhunDhti hai unhin rahon ko saba mere ba'd

mahfil-e-sher-o-suKHan 'shaiKH' hai suni suni

ho gai saz se mahrum sada mere ba'd