kis qadar hai rawan-dawan KHushbu

kis qadar hai ravāñ-davāñ ḳhushbū

ho ga.ī thak ke nīm-jāñ ḳhushbū

jab chalā qāfila bahāroñ kā

ban ga.ī mīr-e-kārvāñ ḳhushbū

aa.ī hai itr-bez jhoñke sī

un ke paikar kī mehrbāñ ḳhushbū

rang letī haiñ apne jism tamām

jazb kartī haiñ titliyāñ ḳhushbū

bhārī hai anginat gulāboñ par

adh-khile jism kī javāñ ḳhushbū

kitnī ḳhāmoshī se milātī hai

jism se jism jaañ se jaañ ḳhushbū

sau zabānoñ meñ baat kartī hai

vasl kī raat hai zabāñ ḳhushbū

narm sargoshiyāñ sunātī hai

garm sāñsoñ ke darmiyāñ ḳhushbū

un ke qadmoñ ko chūmtī 'hāmid'

jā chukī hai kahāñ kahāñ ḳhushbū

kis qadar hai rawan-dawan KHushbu

ho gai thak ke nim-jaan KHushbu

jab chala qafila bahaaron ka

ban gai mir-e-karwan KHushbu

aai hai itr-bez jhonke si

un ke paikar ki mehrban KHushbu

rang leti hain apne jism tamam

jazb karti hain titliyan KHushbu

bhaari hai anginat gulabon par

adh-khile jism ki jawan KHushbu

kitni KHamoshi se milati hai

jism se jism jaan se jaan KHushbu

sau zabanon mein baat karti hai

wasl ki raat hai zaban KHushbu

narm sargoshiyan sunati hai

garm sanson ke darmiyan KHushbu

un ke qadmon ko chumti 'hamid'

ja chuki hai kahan kahan KHushbu