kis qadar kam-asas hain kuchh log

kis qadar kam-asās haiñ kuchh log

sirf apnā qayās haiñ kuchh log

jin ko dīvār-o-dar bhī Dhak na sake

is qadar be-libās haiñ kuchh log

mutma.in haiñ bahut hī duniyā se

phir bhī kitne udaas haiñ kuchh log

vo bure hoñ bhale hoñ jaise hoñ

kuchh hoñ logoñ ko raas haiñ kuchh log

mausamoñ kā koī asar hī nahīñ

in pe jañgal kī ghaas haiñ kuchh log

tīrgī meñ nazar nahīñ aate

saa.e kī tarah paas haiñ kuchh log

kis qadar kam-asas hain kuchh log

sirf apna qayas hain kuchh log

jin ko diwar-o-dar bhi Dhak na sake

is qadar be-libas hain kuchh log

mutmain hain bahut hi duniya se

phir bhi kitne udas hain kuchh log

wo bure hon bhale hon jaise hon

kuchh hon logon ko ras hain kuchh log

mausamon ka koi asar hi nahin

in pe jangal ki ghas hain kuchh log

tirgi mein nazar nahin aate

sae ki tarah pas hain kuchh log