kis qadar mujhko na-tawani hai

kis qadar mujh ko nā-tavānī hai

bār-e-sar se bhī sargirānī hai

chashm-e-tar se jo ḳhūñ-fishānī hai

nāvak-e-ishq kī nishānī hai

saare qur.ān se us parī-rū ko

yaad ik lafz-e-lan-tarānī hai

jab huā rutba-e-fanā fillāh

ġham nahīñ gar jahān-e-fānī hai

hai har ik sher yaar kī tasvīr

fikr apnī ḳhayāl-e-mānī hai

kyuuñ na hoñ āshiq-e-lab-e-jānāñ

chashma-e-āb-e-zindagānī hai

us kī raftār ke likhe haiñ jo vasf

kyā mirī tab.a meñ aatī hai

nāsehā āshiqī meñ rakh ma.azūr

kyā karūñ aalam javānī hai

kis se duuñ us sanam ko maiñ tashbīh

kab ḳhudā.ī meñ us kā saanī hai

na mire zaḳhm par rakho marham

mere qātil kī ye nishānī hai

sar kaTā.eñge sham.a saañ ḳhāmosh

gar yahī apnī be-zabānī hai

ham nahīñ sham.a hoñ jo ashk-fishāñ

kār-e-ushshāq jāñ-fishānī hai

muñh ne ghar meñ mire rakkhā us ko

ye bhī tā.īd-e-āsmānī hai

dil bhī us se uThā nahīñ sakte

nā-tavānī sī nā-tavānī hai

qad-e-mauzūñ ke ishq meñ 'goyā'

raat din shuġhl-e-sher-ḳhvānī hai

kis qadar mujh ko na-tawani hai

bar-e-sar se bhi sargirani hai

chashm-e-tar se jo KHun-fishani hai

nawak-e-ishq ki nishani hai

sare quran se us pari-ru ko

yaad ek lafz-e-lan-tarani hai

jab hua rutba-e-fana fillah

gham nahin gar jahan-e-fani hai

hai har ek sher yar ki taswir

fikr apni KHayal-e-mani hai

kyun na hon aashiq-e-lab-e-jaanan

chashma-e-ab-e-zindagani hai

us ki raftar ke likhe hain jo wasf

kya meri taba mein aati hai

naseha aashiqi mein rakh mazur

kya karun aalam jawani hai

kis se dun us sanam ko main tashbih

kab KHudai mein us ka sani hai

na mere zaKHm par rakho marham

mere qatil ki ye nishani hai

sar kaTaenge shama san KHamosh

gar yahi apni be-zabani hai

hum nahin shama hon jo ashk-fishan

kar-e-ushshaq jaan-fishani hai

munh ne ghar mein mere rakkha us ko

ye bhi taid-e-asmani hai

dil bhi us se uTha nahin sakte

na-tawani si na-tawani hai

qad-e-mauzun ke ishq mein 'goya'

raat din shughl-e-sher-KHwani hai