kis rah pe hain rawan-dawan hum

kis raah pe haiñ ravāñ-davāñ ham

jā.eñge ḳhabar nahīñ kahāñ ham

ik baar fareb khā ga.e the

ab tak haiñ kisī se bad-gumāñ ham

yuuñ terī nigāh se gire haiñ

goyā the matā-e-rā.egāñ ham

rastoñ kī ḳhabar na manziloñ kī

kyā jāniye aa ga.e kahāñ ham

dil meñ thiiñ kuchh aisī hasrateñ bhī

tujh se jo na kar sake yahāñ ham

guzrī hai qafas meñ umr lekin

bhūle nahīñ yaad āshiyāñ ham

har haal ḳhushī unhī kī chāhī

karte rahe pās-e-dostāñ ham

pesh aa.e na-jāne kyā safar meñ

ghar se to chale haiñ shādmāñ ham

ik manzil-e-be-nishāñ kī dhun meñ

'shafqat' na phire kahāñ kahāñ ham

kis rah pe hain rawan-dawan hum

jaenge KHabar nahin kahan hum

ek bar fareb kha gae the

ab tak hain kisi se bad-guman hum

yun teri nigah se gire hain

goya the mata-e-raegan hum

raston ki KHabar na manzilon ki

kya jaaniye aa gae kahan hum

dil mein thin kuchh aisi hasraten bhi

tujh se jo na kar sake yahan hum

guzri hai qafas mein umr lekin

bhule nahin yaad aashiyan hum

har haal KHushi unhi ki chahi

karte rahe pas-e-dostan hum

pesh aae na-jaane kya safar mein

ghar se to chale hain shadman hum

ek manzil-e-be-nishan ki dhun mein

'shafqat' na phire kahan kahan hum