kis tarah aae teri bazm-e-tarab mein aaina

kis tarah aa.e tirī bazm-e-tarab meñ aa.ina

hai nazar-band āj-kal shahr-e-halab meñ aa.ina

hind se us tak jo le jaa.e koī tasvīr-e-yār

sharm se lailā na dekhe phir arab meñ aa.ina

bazm meñ bulvā.e jaldī ki ik muddat se hai

ishtiyāq-e-zulf-o-ḳhat-o-chashm-o-lab meñ aa.ina

naukrī bhī kī to hairānī faqat ham ko milī

aarsī tanḳhvāh meñ paa.ī talab meñ aa.ina

shaiḳh-sāhab tā-kujā ārā.ish-e-resh-e-saped

dekhiye shāna balā meñ hai ġhazab meñ aa.ina

sāqiyā ye aa.ina hai terā mai-ḳhāna nahīñ

hai har ik sāġhar kaf-e-bintul-anab meñ aa.ina

dekhne jaatā hai us ko tāb-e-nazzāra nahīñ

sāda-lauh us se huā mash.hūr sab meñ aa.ina

kis tarah aae teri bazm-e-tarab mein aaina

hai nazar-band aaj-kal shahr-e-halab mein aaina

hind se us tak jo le jae koi taswir-e-yar

sharm se laila na dekhe phir arab mein aaina

bazm mein bulwae jaldi ki ek muddat se hai

ishtiyaq-e-zulf-o-KHat-o-chashm-o-lab mein aaina

naukri bhi ki to hairani faqat hum ko mili

aarsi tanKHwah mein pai talab mein aaina

shaiKH-sahab ta-kuja aaraish-e-resh-e-saped

dekhiye shana bala mein hai ghazab mein aaina

saqiya ye aaina hai tera mai-KHana nahin

hai har ek saghar kaf-e-bintul-anab mein aaina

dekhne jata hai us ko tab-e-nazzara nahin

sada-lauh us se hua mashhur sab mein aaina