kis tarah usko bulaun KHana-e-barbaad mein

kis tarah us ko bulā.ūñ ḳhāna-e-barbād meñ

dil ta.assur chāhtā hai be-sadā fariyād meñ

tīrgī-e-ḳhush-gumāñ hai jī jahāñ lagne lage

sham-e-vahshat ik jalā.ūñ is jahān-e-shād meñ

jāntī huuñ ye hikāyat fasl-e-barbādī kī hai

par matā-e-dil yahī hai sīna-e-nāshād meñ

vo misāl-e-ḳhvāb-e-rañgīñ ab kahāñ maujūd hai

so rahī huuñ maiñ abhī tak ḳhvāb-gāh-e-yād meñ

rishta-e-mub.ham ko phir se joḌtī hai soch ik

dil usī ko DhūñDhtā hai ek ḳhvāb-ābād meñ

ḳhush-nigāhī us harīf-e-jāñ kī yuuñ achchhī lage

maiñ taḌapnā bhī na chāhūñ panja-e-sayyād meñ

is ġham-e-vahshat-zada kā chāra-jū koī nahīñ

imtihān-e-zabt hai ik is ḳharāb-ābād meñ

har hisār-e-ḳhush-numā ko toḌtī jaatī huuñ maiñ

ek ḳhū-e-dasht-gardī hai mirī buniyād meñ

kis tarah us ko bulaun KHana-e-barbaad mein

dil tassur chahta hai be-sada fariyaad mein

tirgi-e-KHush-guman hai ji jahan lagne lage

sham-e-wahshat ek jalaun is jahan-e-shad mein

jaanti hun ye hikayat fasl-e-barbaadi ki hai

par mata-e-dil yahi hai sina-e-nashad mein

wo misal-e-KHwab-e-rangin ab kahan maujud hai

so rahi hun main abhi tak KHwab-gah-e-yaad mein

rishta-e-mubham ko phir se joDti hai soch ek

dil usi ko DhunDhta hai ek KHwab-abaad mein

KHush-nigahi us harif-e-jaan ki yun achchhi lage

main taDapna bhi na chahun panja-e-sayyaad mein

is gham-e-wahshat-zada ka chaara-ju koi nahin

imtihan-e-zabt hai ek is KHarab-abaad mein

har hisar-e-KHush-numa ko toDti jati hun main

ek KHu-e-dasht-gardi hai meri buniyaad mein