kis tarh wo aalam ko na diwana bana de

kis tarh vo 'ālam ko na dīvāna banā de

ye husn ye andāz-o-adā jis ko ḳhudā de

dekhī nahīñ jaatī hai kisī se mirī hālat

ab vo bhī ye kahte haiñ ḳhudā us ko shifā de

phir hosh ke 'ālam meñ bhalā aa.uuñ maiñ kyūñkar

ġhash meñ mujhe dāman se jo vo apne havā de

jāñ-bāzī-e-parvāna pe kiije na ta'ajjub

qismat hai jise himmat-e-mardāna ḳhudā de

vo dekh ke kahte haiñ mirī naz' meñ uljhan

yuuñ maut javānī meñ kisī ko na ḳhudā de

kyā jaane vo kyā lutf hai āshufta-sarī meñ

jab tak na kisī ko dil-e-dīvāna ḳhudā de

muusā talab-e-dīd pe isrār na kiije

kyā ho jo naqāb-e-ruḳh-e-raushan vo uThā de

ḳhilqat kī zabāñ kā hai ye adnā sā karishma

thoḌī sī ho baat aur vo afsāna banā de

aa.e haiñ 'ayādat ko sirhāne dam-e-āḳhir

allāh mirī naz' ke lamhāt baḌhā de

kyoñ sajde meñ us ke na jhukeñ sab kī jabīneñ

ik ḳhaak ke putle ko jo insān banā de

kis tarh wo 'alam ko na diwana bana de

ye husn ye andaz-o-ada jis ko KHuda de

dekhi nahin jati hai kisi se meri haalat

ab wo bhi ye kahte hain KHuda us ko shifa de

phir hosh ke 'alam mein bhala aaun main kyunkar

ghash mein mujhe daman se jo wo apne hawa de

jaan-bazi-e-parwana pe kije na ta'ajjub

qismat hai jise himmat-e-mardana KHuda de

wo dekh ke kahte hain meri naz' mein uljhan

yun maut jawani mein kisi ko na KHuda de

kya jaane wo kya lutf hai aashufta-sari mein

jab tak na kisi ko dil-e-diwana KHuda de

musa talab-e-did pe israr na kije

kya ho jo naqab-e-ruKH-e-raushan wo uTha de

KHilqat ki zaban ka hai ye adna sa karishma

thoDi si ho baat aur wo afsana bana de

aae hain 'ayaadat ko sirhane dam-e-aKHir

allah meri naz' ke lamhat baDha de

kyon sajde mein us ke na jhuken sab ki jabinen

ek KHak ke putle ko jo insan bana de