kis zindagi ke moD pe laya gaya mujhe

kis zindagī ke moḌ pe laayā gayā mujhe

maiñ hañs rahī thī aur rulāyā gayā mujhe

pahle to tīra-baḳht musalsal kahā gayā

phir taḳht-e-zau-fishāñ pe biThāyā gayā mujhe

pahle to intiḳhāb huā nām-e-husn par

phir ism-e-ishq le ke banāyā gayā mujhe

mujh se mire ḳhayāl kī tanhā.ī chhin ga.ī

mahfil meñ kis sadā se bulāyā gayā mujhe

aġhyār se vo kartā rahā muskurā ke baat

is aag kī hadoñ meñ jalāyā gayā mujhe

rahbar ne is tarah se diyā hai mujhe fareb

manzil se haT ke rasta dikhāyā gayā mujhe

pahle mirī vafā ko mo.attar kiyā gayā

phir gulshan-e-hayā se sajāyā gayā mujhe

ik shaḳhs aa gayā hai na.ī raushnī ke saath

ye bhī ḳhat-e-nafas se batāyā gayā mujhe

vo kaun āsmān-e-tasavvur hai 'hādia'

merī zamīñ se jis meñ basāyā gayā mujhe

kis zindagi ke moD pe laya gaya mujhe

main hans rahi thi aur rulaya gaya mujhe

pahle to tira-baKHt musalsal kaha gaya

phir taKHt-e-zau-fishan pe biThaya gaya mujhe

pahle to intiKHab hua nam-e-husn par

phir ism-e-ishq le ke banaya gaya mujhe

mujh se mere KHayal ki tanhai chhin gai

mahfil mein kis sada se bulaya gaya mujhe

aghyar se wo karta raha muskura ke baat

is aag ki hadon mein jalaya gaya mujhe

rahbar ne is tarah se diya hai mujhe fareb

manzil se haT ke rasta dikhaya gaya mujhe

pahle meri wafa ko moattar kiya gaya

phir gulshan-e-haya se sajaya gaya mujhe

ek shaKHs aa gaya hai nai raushni ke sath

ye bhi KHat-e-nafas se bataya gaya mujhe

wo kaun aasman-e-tasawwur hai 'hadia'

meri zamin se jis mein basaya gaya mujhe