kise gharaz thi jo hu ki faza mein ja milta

kise ġharaz thī jo hū kī fazā meñ jā miltā

talāsh koī na kartā agar ḳhudā miltā

yaqīn hai ki sitāre jagah se haT jaate

qadam jo ham bhī uThāte to rāstā miltā

tire ḳhayāl meñ hotī fidā bhī jaan agar

tirā ḳhayāl kabhī to amal se jā miltā

sukūn-e-qalb koī rahguzar kī chiiz nahīñ

uThā ke le hī na aate agar paḌā miltā

hayāt-o-ilm-o-nashāt-o-malāl-o-dānish-o-marg

bashar ko aur libās-e-bashar meñ kyā miltā

sitam hī thā jo kahīñ ma.arifat meñ kho jaate

janāb-e-'najm' kahāñ aap kā patā miltā

kise gharaz thi jo hu ki faza mein ja milta

talash koi na karta agar KHuda milta

yaqin hai ki sitare jagah se haT jate

qadam jo hum bhi uThate to rasta milta

tere KHayal mein hoti fida bhi jaan agar

tera KHayal kabhi to amal se ja milta

sukun-e-qalb koi rahguzar ki chiz nahin

uTha ke le hi na aate agar paDa milta

hayat-o-ilm-o-nashat-o-malal-o-danish-o-marg

bashar ko aur libas-e-bashar mein kya milta

sitam hi tha jo kahin marifat mein kho jate

janab-e-'najm' kahan aap ka pata milta