kise KHayal ki ishrat ke bab kitne hain

kise ḳhayāl ki ishrat ke baab kitne haiñ

ye pyaas kitnī hai is par sarāb kitne haiñ

safīna ghaaT lagā dekh ham ye bhuul ga.e

ki vo safīne jo haiñ ġharq-e-āb kitne haiñ

tū ye na pūchh mire gaañv meñ haiñ ghar kitne

ye pūchh kaun se ghar meñ azaab kitne haiñ

sharīk-e-ġham use kar to liyā magar socho

ki zimmedār ke zimme javāb kitne haiñ

baḌā ġhurūr hai tujh ko aziim lashkar par

kabhī to soch tire ham-rikāb kitne haiñ

lachaktī shāḳh pe kāñTe bhī kam nahīñ hote

yahī na dekhiye kis par gulāb kitne haiñ

kise KHayal ki ishrat ke bab kitne hain

ye pyas kitni hai is par sarab kitne hain

safina ghaT laga dekh hum ye bhul gae

ki wo safine jo hain gharq-e-ab kitne hain

tu ye na puchh mere ganw mein hain ghar kitne

ye puchh kaun se ghar mein azab kitne hain

sharik-e-gham use kar to liya magar socho

ki zimmedar ke zimme jawab kitne hain

baDa ghurur hai tujh ko azim lashkar par

kabhi to soch tere ham-rikab kitne hain

lachakti shaKH pe kanTe bhi kam nahin hote

yahi na dekhiye kis par gulab kitne hain