kise nadim kise ham-nawa kahen apna

kise nadīm kise ham-navā kaheñ apnā

biThā ke paas kise mudda.ā kaheñ apnā

rah-e-hayāt meñ apne parāyoñ se haT kar

koī mile to use mājrā kaheñ apnā

adā-e-parda-nashīnī kī shaan kahtī hai

vo but hai to bhī use ham ḳhudā kaheñ apnā

qadam qadam pe na kyuuñ ahl-e-kārvāñ bhaTkeñ

vo rāhzan hai jise rahnumā kaheñ apnā

hamāre paas Thahartā hai ajnabī kī tarah

ravish jab us kī ho aisī to kyā kaheñ apnā

vo rū-ba-rū hai to hotī hai ḳhud-shanāsā.ī

jamāl-e-yār ko ham ā.īna kaheñ apnā

tire sulūk par ab ye savāl uThtā hai

tujhe parāyā kahe jaa.eñ yā kaheñ apnā

'rishī' huā to hai apne bhī haal kā pursāñ

vo shaḳhs ham jise dard-āshnā kaheñ apnā

kise nadim kise ham-nawa kahen apna

biTha ke pas kise muddaa kahen apna

rah-e-hayat mein apne parayon se haT kar

koi mile to use majra kahen apna

ada-e-parda-nashini ki shan kahti hai

wo but hai to bhi use hum KHuda kahen apna

qadam qadam pe na kyun ahl-e-karwan bhaTken

wo rahzan hai jise rahnuma kahen apna

hamare pas Thaharta hai ajnabi ki tarah

rawish jab us ki ho aisi to kya kahen apna

wo ru-ba-ru hai to hoti hai KHud-shanasai

jamal-e-yar ko hum aaina kahen apna

tere suluk par ab ye sawal uThta hai

tujhe paraya kahe jaen ya kahen apna

'rishi' hua to hai apne bhi haal ka pursan

wo shaKHs hum jise dard-ashna kahen apna