kisi be-dard ko zulm-o-sitam ka shauq jab hoga

kisī be-dard ko zulm-o-sitam kā shauq jab hogā

ye merā ek dil lākhoñ diloñ meñ muntaḳhab hogā

hamārā aur un kā sāmnā mahshar meñ jab hogā

vo jalsa vo samāñ vo ma.arka bhī kuchh ajab hogā

koī zinda rahe duniyā meñ kyā aglī umīdoñ par

abhī to hijr kā ronā hai hogā vasl jab hogā

laḌakpan jā chukā un kā javānī aane vaalī hai

kabhī mujh par jafā hotī thī lekin qahr ab hogā

tumhāre vasl kī saa.at hamesha Taltī rahtī hai

ḳhudā jaane kahāñ hogā kise ma.alūm kab hogā

abhī lazzat nahīñ us ko milī āzār-e-pinhāñ kī

jo hogā bhī to hote hote dil īzā-talab hogā

vo apne va.ada-e-dīdār se phirne ko phir jaa.eñ

magar ye to samajh leñ bevafā kis kā laqab hogā

mujhe iz.hār-e-ulfat par ye un se daad miltī hai

tumhārā ishq ik din merī zillat kā sabab hogā

bharī mahfil meñ un ko chheḌne kī kyā zarūrat thī

janāb-e-'nūh' tum sā bhī na koī be-adab hogā

kisi be-dard ko zulm-o-sitam ka shauq jab hoga

ye mera ek dil lakhon dilon mein muntaKHab hoga

hamara aur un ka samna mahshar mein jab hoga

wo jalsa wo saman wo marka bhi kuchh ajab hoga

koi zinda rahe duniya mein kya agli umidon par

abhi to hijr ka rona hai hoga wasl jab hoga

laDakpan ja chuka un ka jawani aane wali hai

kabhi mujh par jafa hoti thi lekin qahr ab hoga

tumhaare wasl ki saat hamesha Talti rahti hai

KHuda jaane kahan hoga kise malum kab hoga

abhi lazzat nahin us ko mili aazar-e-pinhan ki

jo hoga bhi to hote hote dil iza-talab hoga

wo apne wada-e-didar se phirne ko phir jaen

magar ye to samajh len bewafa kis ka laqab hoga

mujhe izhaar-e-ulfat par ye un se dad milti hai

tumhaara ishq ek din meri zillat ka sabab hoga

bhari mahfil mein un ko chheDne ki kya zarurat thi

janab-e-'nuh' tum sa bhi na koi be-adab hoga