kisi bhi kaam ka mera hunar nahin na sahi

kisī bhī kaam kā merā hunar nahīñ na sahī

havā-e-dahr muāfiq agar nahīñ na sahī

kuaañ hai aur sabhī nāqidān-e-sher-o-adab

mire kalām pe un kī nazar nahīñ na sahī

ye terī bazm hai yaañ terā sikka chaltā hai

koī bhī baat mirī mo'tabar nahīñ na sahī

yahī bahut hai ki kuchh log sochne to lage

koī bhī merā agar ham nazar nahīñ na sahī

havā kā kyā hai havā ruḳh badaltī rahtī hai

tirī nigāh agar aaj idhar nahīñ na sahī

diloñ se uThne lagī haiñ ajab ajab lahreñ

kisī bhī aañkh meñ koī ḳhabar nahīñ na sahī

ilaaj meñ to na maiñ koī kasar chhoḌūñgā

kisī davā meñ bhī koī asar nahīñ na sahī

shajar lagā.e haiñ maiñ ne ye kam nahīñ e.azāz

mire nasīb meñ 'rūhī' samar nahīñ na sahī

kisi bhi kaam ka mera hunar nahin na sahi

hawa-e-dahr muafiq agar nahin na sahi

kuan hai aur sabhi naqidan-e-sher-o-adab

mere kalam pe un ki nazar nahin na sahi

ye teri bazm hai yan tera sikka chalta hai

koi bhi baat meri mo'tabar nahin na sahi

yahi bahut hai ki kuchh log sochne to lage

koi bhi mera agar hum nazar nahin na sahi

hawa ka kya hai hawa ruKH badalti rahti hai

teri nigah agar aaj idhar nahin na sahi

dilon se uThne lagi hain ajab ajab lahren

kisi bhi aankh mein koi KHabar nahin na sahi

ilaj mein to na main koi kasar chhoDunga

kisi dawa mein bhi koi asar nahin na sahi

shajar lagae hain main ne ye kam nahin eazaz

mere nasib mein 'ruhi' samar nahin na sahi