kisi bhi shaKHs se shikwa na ab gila rakkho

kisī bhī shaḳhs se shikva na ab gila rakkho

'ajīb din haiñ laboñ par faqat du'ā rakkho

ye vaqt pahle bhī aa kar guzar gayā ka.ī baar

guzartā jā.egā ye vaqt hausla rakkho

jo aaj aate haiñ aañsū to koī baat nahīñ

lahū bhī aa.egā āñkhoñ kā dar khulā rakkho

ye chhup na jaa.eñ phir ik baar āstīnoñ meñ

har ek ḳhanjar-e-qātil pe ik galā rakkho

tumhāre qatl pe mātam bhī ab nahīñ hogā

tum ab ye āḳhirī ummīd bhī uThā rakkho

tabhī to kahte the tā’dād kuchh nahīñ hotī

tabhī to kahte the zehnoñ meñ karbalā rakkho

havā ke sāmne rakkhī havā to kyā hāsil

na.e charāġh jalāo na.ī ziyā rakkho

kisi bhi shaKHs se shikwa na ab gila rakkho

'ajib din hain labon par faqat du'a rakkho

ye waqt pahle bhi aa kar guzar gaya kai bar

guzarta jaega ye waqt hausla rakkho

jo aaj aate hain aansu to koi baat nahin

lahu bhi aaega aankhon ka dar khula rakkho

ye chhup na jaen phir ek bar aastinon mein

har ek KHanjar-e-qatil pe ek gala rakkho

tumhaare qatl pe matam bhi ab nahin hoga

tum ab ye aaKHiri ummid bhi uTha rakkho

tabhi to kahte the ta’dad kuchh nahin hoti

tabhi to kahte the zehnon mein karbala rakkho

hawa ke samne rakkhi hawa to kya hasil

nae charagh jalao nai ziya rakkho