kisi bhi sher mein achchha bura kya

kisī bhī sher meñ achchhā burā kyā

bas itnā dekhiye kis ne kahā kyā

abhī insāñ to ban paa.e nahīñ ho

banoge aadmī se devtā kyā

sitāroñ meñ ye kaisī khalbalī hai

falak par aa gayā sūraj nayā kyā

kitāboñ se use fursat nahīñ thī

vo paḌhtā aap kā chehra bhalā kyā

tumhārī hī tarah ho jā.ūñ ya.anī

badal luuñ maiñ bhī apnā rāsta kyā

taraqqī kar rahā hai mulk be-shak

taraqqī ne ġharīboñ ko diyā kyā

'aman' ham to faqīr-e-ishq Thahre

faqīrī meñ ḳhasāra fā.eda kyā

kisi bhi sher mein achchha bura kya

bas itna dekhiye kis ne kaha kya

abhi insan to ban pae nahin ho

banoge aadmi se dewta kya

sitaron mein ye kaisi khalbali hai

falak par aa gaya suraj naya kya

kitabon se use fursat nahin thi

wo paDhta aap ka chehra bhala kya

tumhaari hi tarah ho jaun yani

badal lun main bhi apna rasta kya

taraqqi kar raha hai mulk be-shak

taraqqi ne gharibon ko diya kya

'aman' hum to faqir-e-ishq Thahre

faqiri mein KHasara faeda kya