kisi din ghar mere aaya to hota

kisī din ghar mire aaya to hotā

talattuf mujh pe farmāyā to hotā

zarā zulfoñ ko dikhlāyā to hotā

balā sar par mire laayā to hotā

ayādat ko agar aaya nahīñ vo

janāze par mire aaya to hotā

gul-e-ḳhūbī chaman meñ muskurā kar

zarā ġhunche ko sharmāyā to hotā

bulā kar kaan kī bijlī ko apne

kabhī bijlī ko chamkāyā to hotā

vafā par bhī jafā.eñ kar rahā hai

are zālim tū pachhtāyā to hotā

gulistāñ meñ kisī din dil pe bulbul

mire mānind gul khāyā to hotā

mire lāshe ko ai rashk-e-masīhā

zarā qum kah ke Thukrāyā to hotā

tire ‘ḳhanjar’ se qātil mere mānind

kisī ne sar ko kaTvāyā to hotā

kisi din ghar mere aaya to hota

talattuf mujh pe farmaya to hota

zara zulfon ko dikhlaya to hota

bala sar par mere laya to hota

ayaadat ko agar aaya nahin wo

janaze par mere aaya to hota

gul-e-KHubi chaman mein muskura kar

zara ghunche ko sharmaya to hota

bula kar kan ki bijli ko apne

kabhi bijli ko chamkaya to hota

wafa par bhi jafaen kar raha hai

are zalim tu pachhtaya to hota

gulistan mein kisi din dil pe bulbul

mere manind gul khaya to hota

mere lashe ko ai rashk-e-masiha

zara qum kah ke Thukraya to hota

tere ‘KHanjar’ se qatil mere manind

kisi ne sar ko kaTwaya to hota