kisi hikmat kisi tadbir se bahar nikle

kisī hikmat kisī tadbīr se bāhar nikle

paañv ik baar to zanjīr se bāhar nikle

yuuñ hamā.il huī kal shaam tirī yaad ki ham

sub.h-dam nāla-e-shab-gīr se bāhar nikle

ishq meñ shahd hai is raaz se parda uTThā

log jab bū-e-muġhāfīr se bāhar nikle

aaj phir baḳht ne darvāze pe dastak dī thī

aaj bhī ham zarā tāḳhīr se bāhar nikle

us kī jā vo nahīñ dīvār ye apnā dil hai

us se kah de koī tasvīr se bāhar nikle

hijr kā ġham bhī nahīñ vasl kī ḳhvāhish bhī nahīñ

le mohabbat tirī jāgīr se bāhar nikle

kuchh maza aayā hai jiine kā hameñ bhī 'aḳhlāq'

jab guzargāh-e-dasātīr se bāhar nikle

kisi hikmat kisi tadbir se bahar nikle

panw ek bar to zanjir se bahar nikle

yun hamail hui kal sham teri yaad ki hum

subh-dam nala-e-shab-gir se bahar nikle

ishq mein shahd hai is raaz se parda uTTha

log jab bu-e-mughafir se bahar nikle

aaj phir baKHt ne darwaze pe dastak di thi

aaj bhi hum zara taKHir se bahar nikle

us ki ja wo nahin diwar ye apna dil hai

us se kah de koi taswir se bahar nikle

hijr ka gham bhi nahin wasl ki KHwahish bhi nahin

le mohabbat teri jagir se bahar nikle

kuchh maza aaya hai jine ka hamein bhi 'aKHlaq'

jab guzargah-e-dasatir se bahar nikle