kisi ke hijr ko aise mana rahe the hum

kisī ke hijr ko aise manā rahe the ham

ghaḌī meñ vaqt ko ulTā ghumā rahe the ham

nahīñ thā yaad sabaq apnī zindagī kā hameñ

so imtihān kā parcha banā rahe the ham

kināre baiTh ke aañsū bahā ke aa.e the

nadī kī pyaas ko paanī pilā rahe the ham

kiyā ye jurm ki apne hī dil kī sunte the

yahī kaheñ ki ḳhud apnī sazā rahe the ham

ham us ke zulm ke baḌhne ke intizār meñ the

tabhī to zabt kī quvvat baḌhā rahe the ham

lagā ke ek Thahākā usī ke zer-e-asar

bas apne zaḳhm ko nīchā dikhā rahe the ham

ḳhud apne aap ko shānoñ pe le ke chalte the

ḳhud apne aap kā mātam manā rahe the ham

kisi ke hijr ko aise mana rahe the hum

ghaDi mein waqt ko ulTa ghuma rahe the hum

nahin tha yaad sabaq apni zindagi ka hamein

so imtihan ka parcha bana rahe the hum

kinare baiTh ke aansu baha ke aae the

nadi ki pyas ko pani pila rahe the hum

kiya ye jurm ki apne hi dil ki sunte the

yahi kahen ki KHud apni saza rahe the hum

hum us ke zulm ke baDhne ke intizar mein the

tabhi to zabt ki quwwat baDha rahe the hum

laga ke ek Thahaka usi ke zer-e-asar

bas apne zaKHm ko nicha dikha rahe the hum

KHud apne aap ko shanon pe le ke chalte the

KHud apne aap ka matam mana rahe the hum