kisi ke hijr mein qurban raat karte hue

kisī ke hijr meñ qurbān raat karte hue

kaTā hai vaqt sitāroñ se baat karte hue

vo kyā Daregā na.ī vārdāt karte hue

hameñ guzarnā hai ḳhud ehtiyāt karte hue

kisī ke ḳhvāb uThā.e kisī kī āñkhoñ ne

kisī ko dekhā hai palkoñ ko haath karte hue

ye rāh-e-ishq hai is meñ balā kī phislan hai

sambhal sambhal ke chalo ehtiyāt karte hue

batā.ūñ kyā ki maiñ pahuñchā huuñ kis tarah tum tak

nā-mumkināt ko bhī mumkināt karte hue

vo ek chāñd ki jis ko zamīñ pe laanā hai

nikal rahā huuñ maiñ galiyoñ meñ raat karte hue

mubāhisoñ se bahut tañg aa gayā hai 'pavan'

sunā de ab tū sazā iltifāt karte hue

kisi ke hijr mein qurban raat karte hue

kaTa hai waqt sitaron se baat karte hue

wo kya Darega nai wardat karte hue

hamein guzarna hai KHud ehtiyat karte hue

kisi ke KHwab uThae kisi ki aankhon ne

kisi ko dekha hai palkon ko hath karte hue

ye rah-e-ishq hai is mein bala ki phislan hai

sambhal sambhal ke chalo ehtiyat karte hue

bataun kya ki main pahuncha hun kis tarah tum tak

na-mumkinat ko bhi mumkinat karte hue

wo ek chand ki jis ko zamin pe lana hai

nikal raha hun main galiyon mein raat karte hue

mubahison se bahut tang aa gaya hai 'pawan'

suna de ab tu saza iltifat karte hue