kisi ke hijr mein shab bhar udas rahna hai

kisī ke hijr meñ shab bhar udaas rahnā hai

so mujh ko sub.h talak mahv-e-yās rahnā hai

ye haal hai ki tirī diid ko tarastā huuñ

maiñ sochtā thā mujhe tere paas rahnā hai

tumhāre laakh dilāse bhī rā.egāñ hoñge

us ek shaḳhs ko tā-umr udaas rahnā hai

ye ziist tere sitam kī rahīn hai jānāñ

tire firāq ko is kī asaas rahnā hai

so bazm-e-yār meñ jā kar ġhazal sunā.eñge

nigāh-e-nāz meñ ham ko to ḳhaas rahnā hai

ye aur baat ki dariyā se dostī hai mirī

likhā huā mirī qismat meñ pyaas rahnā hai

junūn-e-ishq meñ bejā hai fikr-e-uryānī

ḳhayāl-e-yār ko merā libās rahnā hai

kisi ke hijr mein shab bhar udas rahna hai

so mujh ko subh talak mahw-e-yas rahna hai

ye haal hai ki teri did ko tarasta hun

main sochta tha mujhe tere pas rahna hai

tumhaare lakh dilase bhi raegan honge

us ek shaKHs ko ta-umr udas rahna hai

ye zist tere sitam ki rahin hai jaanan

tere firaq ko is ki asas rahna hai

so bazm-e-yar mein ja kar ghazal sunaenge

nigah-e-naz mein hum ko to KHas rahna hai

ye aur baat ki dariya se dosti hai meri

likha hua meri qismat mein pyas rahna hai

junun-e-ishq mein beja hai fikr-e-uryani

KHayal-e-yar ko mera libas rahna hai