kisi ke lab pe bhole-pan se mera nam hai shayad

kisī ke lab pe bhole-pan se merā naam hai shāyad

mirī bechārgī se phir kisī ko kaam hai shāyad

ye halchal sī machī hai aaj jo saare zamāne meñ

sunā hai kuchh hamāre vāste paiġhām hai shāyad

tumheñ bhī raas aa.e yā na aa.e aaj kā aalam

tumhārā bhī hamārī hī tarah anjām hai shāyad

zamāne ko nahīñ bhāyā mirā ḳhāmosh sā rahnā

ḳhamoshī bhī mirī ab morid-e-ilzām hai shāyad

na kaalī raat kaTtī hai na raushan din guzartā hai

kisī se dil lagāne kā yahī anjām hai shāyad

asar kartā agar naala to patthar mom ho jaatā

abhī jazb-e-mohabbat hī hamārā ḳhaam hai shāyad

faqat rusvā.iyāñ likkhī haiñ 'shādāñ' ke muqaddar meñ

rah-e-ulfat meñ chalne kā yahī in.aam hai shāyad

kisi ke lab pe bhole-pan se mera nam hai shayad

meri bechaargi se phir kisi ko kaam hai shayad

ye halchal si machi hai aaj jo sare zamane mein

suna hai kuchh hamare waste paigham hai shayad

tumhein bhi ras aae ya na aae aaj ka aalam

tumhaara bhi hamari hi tarah anjam hai shayad

zamane ko nahin bhaya mera KHamosh sa rahna

KHamoshi bhi meri ab morid-e-ilzam hai shayad

na kali raat kaTti hai na raushan din guzarta hai

kisi se dil lagane ka yahi anjam hai shayad

asar karta agar nala to patthar mom ho jata

abhi jazb-e-mohabbat hi hamara KHam hai shayad

faqat ruswaiyan likkhi hain 'shadan' ke muqaddar mein

rah-e-ulfat mein chalne ka yahi inam hai shayad