kisi ke tir-e-nazar ka ye dil nishana hua

kisī ke tīr-e-nazar kā ye dil nishānā huā

lo un kā ab to ḳhayāloñ meñ ānā-jānā huā

ye kaun joḌ rahā hai uThā ke har TukḌā

ke mere dil ko to TuuTe hue zamānā huā

ki vaqt-e-nazā.a nikaltī hai ruuh jis tarah

vo mere jism se is tarah se ravānā huā

vo is qadar mirī āñkhoñ ko de gayā paanī

ki sard rātoñ meñ ruḳhsār ko nahānā huā

jo is meñ aaya thā vo kyā dahaktā sūraj thā

sulag ke ḳhaak mire dil kā āshiyānā huā

sitāre toḌ ke maiñ us kī maañg bhartā thā

ye ārzūoñ kā mausam bahut purānā huā

ye lag rahā hai ḳhayāloñ se phir vo guzre haiñ

hamārī aañkh meñ jab āñsuoñ kā aanā huā

uThāyā us ne tabhī jab use zarūrat thī

girāyā us ne nigāhoñ se jab girānā huā

ḳhud apne pairoñ pe qātil ke dar pe aatā huuñ

lahū meñ apne hameñ jab kabhī nahānā huā

ki qatl ho gayā maqtūl saath qātil ke

ye vaar us kā magar mujh pe ādilāna huā

'ovais' ab to kuchh 'ādat sī ho ga.ī hai hameñ

ham un ke paas ga.e jab bhī zaḳhm khānā huā

kisi ke tir-e-nazar ka ye dil nishana hua

lo un ka ab to KHayalon mein aana-jaana hua

ye kaun joD raha hai uTha ke har TukDa

ke mere dil ko to TuTe hue zamana hua

ki waqt-e-nazaa nikalti hai ruh jis tarah

wo mere jism se is tarah se rawana hua

wo is qadar meri aankhon ko de gaya pani

ki sard raaton mein ruKHsar ko nahana hua

jo is mein aaya tha wo kya dahakta suraj tha

sulag ke KHak mere dil ka aashiyana hua

sitare toD ke main us ki mang bharta tha

ye aarzuon ka mausam bahut purana hua

ye lag raha hai KHayalon se phir wo guzre hain

hamari aankh mein jab aansuon ka aana hua

uThaya us ne tabhi jab use zarurat thi

giraya us ne nigahon se jab girana hua

KHud apne pairon pe qatil ke dar pe aata hun

lahu mein apne hamein jab kabhi nahana hua

ki qatl ho gaya maqtul sath qatil ke

ye war us ka magar mujh pe aadilana hua

'owais' ab to kuchh 'adat si ho gai hai hamein

hum un ke pas gae jab bhi zaKHm khana hua