kisi ki chah mein gham kya hai aur KHushi kya hai

kisī kī chaah meñ ġham kyā hai aur ḳhushī kyā hai

tujhe ḳhabar nahīñ mafhūm-e-āshiqī kyā hai

tapish meñ dhuup ke hotī hai qadr saa.e kī

na ho jo maut kā ḳhatra to zindagī kyā hai

nahīñ hai farq añdhere meñ aur ujāle meñ

nazar na aa.e jahāñ to vo raushnī kyā hai

haiñ yuuñ to saikḌoñ maḳhlūq bazm-e-hastī meñ

nahīñ hai dil meñ mohabbat to aadmī kyā hai

rahe jo dil se lipaT kar vo ġham hī behtar hai

jo chand lamhoñ kī mehmāñ hai vo ḳhushī kyā hai

hai aadmī to uThānā hai baar hastī kā

hai aas jiine kī hoñToñ pe kapkapī kyā hai

tire liye to jhukānā bhī sar ibādat hai

agar jhukā na sake dil to bandagī kyā hai

tumhāre jalva-e-aqdas kā ek partav hai

ye najm aur ye zohra ye mushtarī kyā hai

vo dil-lagī hai agar gudgudī sī aa jaa.e

jalā de dil ko jo 'asġhar' vo dil-lagī kyā hai

kisi ki chah mein gham kya hai aur KHushi kya hai

tujhe KHabar nahin mafhum-e-ashiqi kya hai

tapish mein dhup ke hoti hai qadr sae ki

na ho jo maut ka KHatra to zindagi kya hai

nahin hai farq andhere mein aur ujale mein

nazar na aae jahan to wo raushni kya hai

hain yun to saikDon maKHluq bazm-e-hasti mein

nahin hai dil mein mohabbat to aadmi kya hai

rahe jo dil se lipaT kar wo gham hi behtar hai

jo chand lamhon ki mehman hai wo KHushi kya hai

hai aadmi to uThana hai bar hasti ka

hai aas jine ki honTon pe kapkapi kya hai

tere liye to jhukana bhi sar ibaadat hai

agar jhuka na sake dil to bandagi kya hai

tumhaare jalwa-e-aqdas ka ek partaw hai

ye najm aur ye zohra ye mushtari kya hai

wo dil-lagi hai agar gudgudi si aa jae

jala de dil ko jo 'asghar' wo dil-lagi kya hai