kisi ki jit ka sadma kisi ki mat ka bojh

kisī kī jiit kā sadma kisī kī maat kā bojh

kahāñ tak aur uThā.eñ ta.alluqāt kā bojh

anā kā bojh bhī aayā usī ke hisse meñ

bahut hai jis ke uThāne ko apnī zaat kā bojh

jhaTak diyā hai kabhī sar se bār-e-hastī bhī

uThā liyā hai kabhī sar pe kā.enāt kā bojh

abhī se aaj ke din kā hisāb kyā ma.anī

abhī to zehn pe baaqī hai kal kī raat kā bojh

yahī na ho maiñ kisī din kuchal ke rah jā.ūñ

ubhārtā hai bahut zaat ko sifāt kā bojh

paḌā thā saaya bas ik baar dast-e-shafqat kā

so ab ye sar hai mirā aur kisī ke haath kā bojh

abhī do chaar na kar hijr kī aziyyat se

abhī to maiñ ne uThāyā hai tere saath kā bojh

kisi ki jit ka sadma kisi ki mat ka bojh

kahan tak aur uThaen talluqat ka bojh

ana ka bojh bhi aaya usi ke hisse mein

bahut hai jis ke uThane ko apni zat ka bojh

jhaTak diya hai kabhi sar se bar-e-hasti bhi

uTha liya hai kabhi sar pe kaenat ka bojh

abhi se aaj ke din ka hisab kya mani

abhi to zehn pe baqi hai kal ki raat ka bojh

yahi na ho main kisi din kuchal ke rah jaun

ubhaarta hai bahut zat ko sifat ka bojh

paDa tha saya bas ek bar dast-e-shafqat ka

so ab ye sar hai mera aur kisi ke hath ka bojh

abhi do chaar na kar hijr ki aziyyat se

abhi to main ne uThaya hai tere sath ka bojh