kisi ki KHamiyon ka tazkira nahin karte

kisī kī ḳhāmiyoñ kā tazkira nahīñ karte

yuuñ apne aap ko chhoTā kiyā nahīñ karte

safar meñ kitne hī logoñ se ham yuuñ milte haiñ

sabhī se hī to magar dil milā nahīñ karte

hameñ bhī dard to hotā hai be-ruḳhī se tirī

ye aur baat hai ki ham gila nahīñ karte

isī meñ behtarī hai saadh lījiye chuppī

nadī meñ rah ke magar se laḌā nahīñ karte

kabhī to maan liyā kījiye hamārā bhī

har ek baat pe itnā uḌā nahīñ karte

zarūr koī to hotī hai ḳhāsiyat un meñ

yūñhī to log diloñ meñ basā nahīñ karte

ye mushkileñ bhī zarūrī haiñ raah meñ 'madhuman'

baġhair dhuup ke to gul khilā nahīñ karte

kisi ki KHamiyon ka tazkira nahin karte

yun apne aap ko chhoTa kiya nahin karte

safar mein kitne hi logon se hum yun milte hain

sabhi se hi to magar dil mila nahin karte

hamein bhi dard to hota hai be-ruKHi se teri

ye aur baat hai ki hum gila nahin karte

isi mein behtari hai sadh lijiye chuppi

nadi mein rah ke magar se laDa nahin karte

kabhi to man liya kijiye hamara bhi

har ek baat pe itna uDa nahin karte

zarur koi to hoti hai KHasiyat un mein

yunhi to log dilon mein basa nahin karte

ye mushkilen bhi zaruri hain rah mein 'madhuman'

baghair dhup ke to gul khila nahin karte