kisi ki nek ho ya bad jahan mein KHu nahin chhupti

kisī kī nek ho yā bad jahāñ meñ ḳhū nahīñ chhuptī

chhupā.e laakh ḳhushbū yā koī badbū nahīñ chhuptī

zabāñ par jab talak aatī nahīñ albatta chhuptī hai

zabāñ par jab ki aa.ī baat ai gul-rū nahīñ chhuptī

yahāñ to tujh ko sau parde lage haiñ ahl-e-taqvā se

bhalā rindoñ se kyuuñ ai duḳhtar-e-raz tū nahīñ chhuptī

salīqa kyā kare is meñ koī betābi-e-jāñ ko

chhupāo sau tarah jab dil ho be-qābū nahīñ chhuptī

hijāb us meñ kahāñ hai be-hijābī jis kī aadat ho

chhupā kar laakh piive gar koī daarū nahīñ chhuptī

ruḳh-e-raushan ko tum kyuuñ chhoḌ kar zulfeñ chhupāte ho

chamak ruḳh kī chhupā.e se tah-e-gesū nahīñ chhuptī

ye riish o jubba o dastār zāhid kī banāvaT hai

tabī.at be-takalluf jis kī ho yaksū nahīñ chhuptī

kalām apnā abas tū ahl-e-dānish se chhupātā hai

jahāñ meñ 'aish' tarz-e-shā.ir-e-ḳhush-go nahīñ chhuptī

kisi ki nek ho ya bad jahan mein KHu nahin chhupti

chhupae lakh KHushbu ya koi badbu nahin chhupti

zaban par jab talak aati nahin albatta chhupti hai

zaban par jab ki aai baat ai gul-ru nahin chhupti

yahan to tujh ko sau parde lage hain ahl-e-taqwa se

bhala rindon se kyun ai duKHtar-e-raz tu nahin chhupti

saliqa kya kare is mein koi betabi-e-jaan ko

chhupao sau tarah jab dil ho be-qabu nahin chhupti

hijab us mein kahan hai be-hijabi jis ki aadat ho

chhupa kar lakh piwe gar koi daru nahin chhupti

ruKH-e-raushan ko tum kyun chhoD kar zulfen chhupate ho

chamak ruKH ki chhupae se tah-e-gesu nahin chhupti

ye rish o jubba o dastar zahid ki banawaT hai

tabiat be-takalluf jis ki ho yaksu nahin chhupti

kalam apna abas tu ahl-e-danish se chhupata hai

jahan mein 'aish' tarz-e-shair-e-KHush-go nahin chhupti