kisi ki purshish-e-gham bar ho gai hogi

kisī kī purshish-e-ġham baar ho ga.ī hogī

tamām dukh hama āzār ho ga.ī hogī

shadīd maut kī yalġhār ho ga.ī hogī

hayāt ret kī dīvār ho ga.ī hogī

vo ek chiiz sharāfat se jo ibārat hai

hamārī raat kī dīvār ho ga.ī hogī

hadīs-e-dil lab-e-iz.hār ke tavassut se

hadīs-e-kūcha-o-bāzār ho ga.ī hogī

tabī.at apnī jo āzār se nahīñ bhartī

harīs-e-lazzat-e-āzār ho ga.ī hogī

uThī jo hogī kabhī dil se koī dard kī lahar

harīf-e-dīda-e-ḳhūñ-bār ho ga.ī hogī

jo ham pe sāya-e-adbār hai to sust zarūr

hamāre kaam kī raftār ho ga.ī hogī

ye zillatoñ kī jo bhar-mār hai to apnī ḳhatā

usī sazā kī sazā-vār ho ga.ī hogī

javāb meñ mirī kotāh-dastiyoñ ke 'zafar'

buland aur vo dīvār ho ga.ī hogī

kisi ki purshish-e-gham bar ho gai hogi

tamam dukh hama aazar ho gai hogi

shadid maut ki yalghaar ho gai hogi

hayat ret ki diwar ho gai hogi

wo ek chiz sharafat se jo ibarat hai

hamari raat ki diwar ho gai hogi

hadis-e-dil lab-e-izhaar ke tawassut se

hadis-e-kucha-o-bazar ho gai hogi

tabiat apni jo aazar se nahin bharti

haris-e-lazzat-e-azar ho gai hogi

uThi jo hogi kabhi dil se koi dard ki lahar

harif-e-dida-e-KHun-bar ho gai hogi

jo hum pe saya-e-adbar hai to sust zarur

hamare kaam ki raftar ho gai hogi

ye zillaton ki jo bhar-mar hai to apni KHata

usi saza ki saza-war ho gai hogi

jawab mein meri kotah-dastiyon ke 'zafar'

buland aur wo diwar ho gai hogi