kisi ki yaad hai aur hasraton ka matam hai

kisī kī yaad hai aur hasratoñ kā mātam hai

bahut dinoñ se lagātār aañkh pur-nam hai

ho zard zard na kyuuñ sham.a kī ziyā yaaro

ki us ko apne pighalne kā jāñ-gusil ġham hai

ġham-o-alam kā bhī ehsās ab nahīñ hotā

shu.ūr-o-fikr-o-nazar kā ajiib aalam hai

lahū jalāo kuchh us meñ ki raushnī to baḌhe

charāġh-e-bazm sar-e-shām hī se maddham hai

bachī hai ḳham meñ jo vo 'faḳhr' hai mirā hissa

ki mere jaam hī meñ dūsroñ se mai kam hai

kisi ki yaad hai aur hasraton ka matam hai

bahut dinon se lagatar aankh pur-nam hai

ho zard zard na kyun shama ki ziya yaro

ki us ko apne pighalne ka jaan-gusil gham hai

gham-o-alam ka bhi ehsas ab nahin hota

shuur-o-fikr-o-nazar ka ajib aalam hai

lahu jalao kuchh us mein ki raushni to baDhe

charagh-e-bazm sar-e-sham hi se maddham hai

bachi hai KHam mein jo wo 'faKHr' hai mera hissa

ki mere jam hi mein dusron se mai kam hai